Oom Kloas en de verskes

E

lkaine wait wel, dat wanneer oom Kloas weer in 't laand is er verskes zongen worden. Zo hebben je "Zie ginds komt de stoomboot", "Hop! Hop! Hop! Paardje in galop!", "Zachtjes gaan de paardevoetjes" en goa zo mor deur.

En dij verskes worden dan constant gejengeld deur 't klaine grut, in de hoop dat oom Kloas, ook bekend as Sunnerkloas of simpelweg Sint, ze dan ook ain kadootje dut in schoune. En mainstal geeft oom Kloas den ook wat, haildail as er ook nog ain winterpeen in leutje schoun propt is veur 't peerd -dij hij  trouwens op stal het bie ome Loeks -. 

Mor der binnen ook verskes dij ain loopje met de woarheid nemen. Loaten we es eem kieken noar dizze zinnen uut "Hoor de wind waait door de bomen". 't Verske kin elkaine wel. Mor ain poar zinnen uut 't verske zint oom Kloas nait. 't Gait hier om:

 Vol verwachting klopt ons hart

Wie de koek krijgt, wie de gard

en

Maar, o wee, o bittere smart

 kregen wij voor koek een gard

Eerst het leutje wicht of leutje jong in de stress brengen deur ze kouke te beloven en doarnoa 't leutje ding alsnog ain pak op zien of heur duvel geven?? Welke halfmaole het dat bedocht? Oom Kloas zekers nait! En wat te denken van dizze zin:

Wie zoet is krijgt lekkers, wie stout is de roe

Mor wat wil 't geval? Oom Kloas zol nooit ain kind duurven sloan met ain takkenbos. Zoiets komt totoal nait in hom op. Hij zol wel gek wezen om dat te doun! Binnen de körtste keren het hij de kinderbeschaarmen achter zich aan.

En elkaine wait ook over de zak van oom Kloas..... Doar worden genog grappen over mokt. Mor dat is nait leuk. Hou dat verhoal van leutje kinderen in de zak stoppen de wereld in is kommen wait oom Kloas ook nait, mor ain kind in ain zak stoppen, dat dut oom Kloas oal haildail nait! 't Kind zol ains stikken...

Wat in vrouger tieden hail pedagogisch (heh, stoer woord) verantwoord was is tegenwoordig nait meer zo vanzulfsprekend. Want ain kindervrund dij zulke vreselijke dingen dut, is snel kindervrund of. En wie wait'n nou almoal wel dan aan de hoal gait met dij titel, aine Claus uut het haile hoge Noorden!

Op dizze wereld lopen genog gekken rond, dij leutje knuppels 'k wait nait wat vreselijks aandoun. Aan dat soort praktijken  dut oom Kloas nait met! Ain beetje ploagen mit Sunnerkloasgedichten, joa dat vindt oom Kloas leuk. Mor sommige dingen goan ook hom te ver. Dat binnen eerder de luu, dei ain pak sloage mit de roe verdainen!

PS  Eh, ik leuf dat ik gehakt bin... want dit kreeg ik net op mien schaarm:

OVER DIJ CHARLATAN PROATST NAIT, GAIN CL☠☣S!!! DIJ NOAM HET BAMBOEZE AANNOMEN OM MIE WIND UUT DE ZEILEN TE NEMEN! WANNEER LEERST HET NOU AINS, JAN!!! VIND 'T OAL AARG GENOG DAST MIEN GEHEIMEN HIER VERKONDIGST, MOR AIN BEETJE RESPECT VEUR D'OAL MAN HEST OOK NAIT MEER IN DE POKKEL!!!

Oeh, oom Kloas is toch wel hail aarg allergisch veur ain bepoalde noam... zol dat aargens met te moaken hebben???