|
I
|
Loaten we het ains hebben over
Paulus de boskabouter en kabouter Plop[1].
De televisieprogramma's over dat soort figuren worden specioal veur de klaine
knuppeltjes van ain joar of vaier mokt. Want kaboutertjes binnen ja zo oardig
en vrolijk en oh zo vrundelijk.
Dat binnen je reinste propagandaverhoalen! En
as je de klainsten mor vrougtiedig begunnen te vertellen dat kabouters zo
stoer, zo charmant en zo oardig binnen (volgens mie heb ik dat wel es voaker
heurd; was der nait zo'n verske?), waiten ze loater nait aans dan dat alle
kaboutertjes goud en laif binnen. Zo wordt ’t leutje grut wordt deur de bonzen
in TV-laand hersenspuild.
Mor ja, dit kinn’n je in dizze moderne
tieden verwachten. Pabbe en moeke binnen
overdag aan’t waark en as popkes van de crèche of schoule kommen, worden ze
subiet achter of veur televisie (gelang ’t standpunt) zet. Kinders
weer stil en zo waiten ze nait aans, dan dat kabouters elke dag in ain
melkhaarbaargke zitten te lanterfanten
of stompzinnige dansjes doun.
Tot mien grote spiet mout ook ik
bekennen dat ik lange tied in het sprookje van Paulus en Plop heb leufd. Mor ik bin van mien geleuf of. Want loat mie joe eem haardhandig uut de
dreum helpen: Zo binnen kabouters ABSOLUUT nait! Wêl eerder wel ains keken het noar de
Belgische Man biet hond wait woar ik ’t over heb. Doar was ain asociale kabouter met de noam
Wesley te zain.
En zo binnen kabouters dus
almoal! Klieren tot en met.
Wat? Ze hoalen joe geregeld 't bloud onder de
noagels vandoan! Vandoar dat ik joe wil woarschauwen veur kabouters. En doarom
zol ik joe ain poar veurbeelden geven van wat veur gekkigheden ze aalmoal doun.
Mainste dingen kommen, denk ik, wel
bekend veur.
Zo binnen der toenbezitters dij
zich nait goud lieken te beseffen, wat veur ain ellende ze op hals hoalen as ze
ain stainen figuur in de toenwinkel kopen en dij in 't toentje zetten. Voak het
de beste man of vrauw ain vievertje aanlegt om der viskes in te doun. Hail
oardig. En doar mout dan ain kereltje met puntmutske op en met hengeltje in de
haand aan de kaant bie ploatst worden.
Dat ze de kat op 't spek binden -
of aans zegt - dat ze ain wolf in schoapskleren binnenhoald hebben, dat lichtje
komt nait bie ze op. Want kabouters hebben oaltied zo'n gezellig dik buukje en
van dij vrolijke kleertjes aan. Met puntmuts. Laifst in de kleur rood. Wat dizze toenbezitters nait beseffen is dat
ze noa ain goud half joar van bienoa alle vissen, dij in de viever zaten, of binnen.
De domkoppen geven dan voak raaigers
de schuld van 't leegvreten van de viever. Fout! Zoas bie de de som ain plus ain twij uutkomt, zo is dat ook
met kabouter plus hengel.
De uutkomst is oaltied viever
leeg, dat is zo ainvoudig as wat! Weg is de dure investering in goldvissen
en koikarpers! Dat dikke buukje van kabouters is der nait veur niks. Of dochten
joe dat kabouters gain vis lusten? En dan heb ik het mor nait over dat puntmutsje....
Nog ain veurbeeld. Der binnen van
dij toenversieringen met schopke, schoffeltje, haarkje of kruuwoagentje in de
handen. Wat dochten je wat dat soort luutjes met joen moestoentje doun? Zodroa
de gruinte en 't fruit riep is, binnen de kabouters er as de kippen bie om
alles in 't kruuwoagentje te stoppen om 't spul in ain kissie aan kaante van de
weg te verkopen veur ain habbekrats. Zulf zain! Je kinnen in haarfsttied nait
fietsen zunder kroampies aan de kaante
van de weg tegen te kommen woar pompoenen[2],
dij ofkeurt binnen veur bewoning van kabouters, massoal aan de kaant van de weg
veur dumpppriezen weggeven worden. Of dochten jullie dat pompoenen verkocht
werden veur de sier?? Dan hebben je 't glad mis!
Volgend verhoal met gelieke
strekking. Denken je dat je ain mooi moaltje eeteerappels kweekt hebben veur
aigen gebruuk in de winterperiode, kiek dan uut veur de kabouters! Binnen de
körtste keren stoat er ain bord in de toene met doarop Ardaappelen te KoOp !! Drei Euroo per vaif kieloo. En doarnoa
hebben je allenig mor gezeur aan de kop van de buren omdat ze denken dat je ain
domkop binnen. 'T liekt er net op asof je de eerste en twijde groep van de
legere schoule oversloagen hebben want de woorden op't bord binnen toch zo goud
spelt[3]!
Vervolgens kriegen je dat gedou
en gezemel met potentiële eerappelkopers, want dij loaten zo'n boetenkansje
natuurlek nait lopen. Je kinnen nait meer roupen dat je gain eerappels
verkopen, want as je dat doun wiezen de belangstell'nden terecht noar dat bord
dat in de veurtoene stait. En 't bord dij dat toenkaboutertje hienzet het
kinnen je nait zo mor vothoalen, oh nee. Binnen drij tellen stait dat bord weer
op zien plek. En zo binnen je hail rap deur joen winterveurroad eeteerappels
hien. En mouten je noodgedwongen noar de AppieHaa tou om veuls te dure eerapels
(voak met gloazige ogen dij je zo mooi aankieken) aan te schaffen.
Met daank aan de kabouters. Ik heb de zin mor eem censureert. Kinder lezen ook met. En as je oeit de kans kriegen om der wat van te zeggen tegen de toenkabouter, let dan goud op! Nog gain dag of twij loater kinnen je in kraante lezen dat gemainte metingen doan het en dat er giftige grond is vonden in -oh wat touvallig- de buurt woar je wonen. Je kinnen drijmoal roaden woar de gemainte de giftige grond het aantroffen. En je wozzen zeker dat dat er twij doagen eerder der nog nait was. Zoll’n de kaboutertjes wel doan hebben is dan ’t antwoord. Letterlijk!
Willen je zulf wat van kabouters
doan hebben, dan mouten je ze wat te eten geven. Simpel as wat. Doun je dat
nait, dan hebben je de poppen aan 't daansen. En dat is je reinste chantage van
dij puntmutsfiguren. As je wat verstommeld hebben, dan wordt ook voak zegt dat
kaboutertjes het doan hebben. Mor nee, dat ligt net eem iets aans! Grode kaans
dat de kaboutertjes het wegrooft hebben veur aigen gebruuk! Kabouters binnen net eksters. Met as gevolg
dat je de verloren dingen noeit nait terug zain. Al lezen je tegenwoordig voak in kraante dat
trouwringen en zuks inains noa drijendattig joar of nog langer weer terugvonden
worden. Doar is ookwel ain verkloaring
veur, de huus- toen- en keukenkabouter is simpel noar ain aandere plek verkast.
Voak is men dan ook bliede dat men zien snuusterij weer terug het en dat men
van ’t gedonder van de puntmutsenmaffia of is.
Joa ze hebben wat gemain met trolletjes. Zo kinnen ze urenlaank doodstil as ain bakstaine aan kaante van de viever stoan met hengeltje (voak met zo'n lachende grijns om de kop dij nait aans te bestempelen is van "wat ik heb jullie mooi tuk met mien truuk"). Tougeven, trollen kinnen ook knap lastig wezen. Doar waiten ze in Noorwegen en Zweden alles van of. Mor vergeleken met kabouters binnen trolletjes engeltjes!
[1]
Dat is ain kenmaark van ze, ze hebben
voak noamen dij met ain P begunnen. Kabouter Wesley's oalders waren wat minder
traditionele luutjes. Zien Pa haitte dan ook Spillebeen, dij van dat hien en
weer gewip op paddestoule (yup, zo'n aine met van dij rood met witte stippen).
Aan dit feit kinnen je zain dat kabouters hailendail niks om de natuur geven.
Kiek mor es goud rond, overal zain je omgeknakte paddestoulen. Puur vandalisme
deur kabouters.
[2] woar het verhoal vandoan komt dat ze in
paddestoulen wonen is mie ain groot roadsel. Goa mor noa, ain padestoule is
veuls te klain om te wonen veur kabouters. Pompoenen kinnen uutholt worden,
kinnen roampies in zet worden (op de methode wat as ik as klain kind wel es
dee, twiegje of takje pakken, wat natte
spinrag deraan hengelen en dan met vinger veurzichtig derover wrieven, zodat
spinrag deurzichtig werd) en wandjes binnen ook nait oal te moeilijk. Ain
stoofke met beetje törf derin en de gemiddelde bemiddelde kabouter het
het prima veurelkoar.
[3] Dat kriegen je met kabouters, want dij
hebben het schrieven best wel redelijk ofkeken van de miensen, mor ze hebben
dat spellen noeit zo goud in de vingers kregen. Vandoar dat er ain Eetje of
Ootje teveul op 't promotiebord stait. En dus stoan je ondanks zes joar legere
school en tien joar eerappels rooien (of peren plukken of - ach wat, wat
dondert 't ook- bedenk 't zulf ook mor) bie de buren en boetenluu veur poal. Of
om 't aans te zeggen: je worden vaierkaant uutlacht deur de burgerij. En wel ’t
nait metain deurhad, dat legere is bewust zo schreven. Ik mag groag met
verdaipens schrieven.
Geen opmerkingen:
Een reactie posten